Gee leiding aan ’n jongmens oor hoe hy moet leef, en hy sal ook as hy al oud is nie daarvan afwyk nie – Spreuke 22:6.
Volgens die Amerikaanse kindersielkundige en professor in sielkunde aan die Harvard-universiteit, Jerome Kagan, word kinders met een van drie basiese temperamente gebore wat bepaal hoe hulle instinktief in probleemsituasies optree. Sommige reageer deur angstig te raak, ander weer met aggressie en sommige met optimisme en ’n laat-maar-loophouding.
’n Angstige kind is dikwels die barometer in ’n gesin. Wanneer hy oor ’n kleinigheid ontsteld raak of sekere situasies oordryf, is daar gewoonlik ’n tikkie waarheid in wat hy sê of ervaar. Tog moet ’n ouer so ’n kind leer om te onderskei tussen dít wat werklik saak maak en dinge wat onbelangrik is.
’n Kind wat instinktief met aggressie reageer se heftige reaksie op onreg of ’n slegte ervaring kan dalk soms die oplossing wees, maar hy moet leer dat dit dikwels beter is om eers te wag en alle kante van ’n saak te bekyk voordat hy iemand trompop loop.
’n Kind wat voorgee dat ’n slegte ervaring haar nie raak nie en haar eie pyn en hartseer onderdruk, het waarskynlik nie die negatiewe belewenis afgeskud nie. Sy moet leer dat ontkenning ook pyn veroorsaak.
Wanneer ouers kinders laat begaan, sal die kinders se natuurlike temperament in elke probleemsituasie na vore kom. Om wys te word moet angstige kinders leer om dapperder te wees. Die voortvarende kind moet leer om te dink voordat hy praat of optree, en die sonskynkind moet leer om slegte situasies in die oë te kyk en daardeur te werk.
Here, skenk my wysheid om my kinders te begelei. Amen.
