Jy mag naas my geen ander gode hê nie (Exodus 20:3).
Nóg iemand wat diep nagedink het oor die invloed van negatiewe magte in ons lewe, is die Britse Anglikaanse priester, Mark Oakley.
Hy praat in dié verband van hedendaagse gode wat ons lewe bedreig. Hierdie gode, so betoog hy, bind ons om blindweg sekere keuses te maak – keuses wat nie altyd gesond vir ons is nie en ons geleidelik wegtrek van ons ware bestemming as mense.
Enkele van hierdie bindinge waarmee die eietydse gode ons verstrik en so van ons vryheid beroof, is:
- Die binding daaraan om heeltyd erken te wil word en gevlei te wil wees – sodat ons hele lewe ‘n poging is om mooier, jonger en gesonder te lyk.
- Die binding daaraan om altyd méér en beter te wil hê – sodat ons hele lewe ‘n soektog word na méér geld, groter huise, blinker motors, beter toestelle en patente en besiger kalenders.
- Die binding van spoed – sodat ons lewe voortdurend ingestel is op vinnige antwoorde, kos, sukses en vinnige liefde. Want ons het nie tyd om te wag nie …
- Die binding van hardheid en ongevoeligheid – sodat woorde soos deernis, goedheid en vergifnis nie langer deel van ons woordeskat is nie.
Die evangelie vra dat ons die God van Christus bo alles sal aanbid (Ex 20:3). Ons aan hiérdie God met oorgawe sal bind.
En so in Christus ons vryheid sal vind.
O Here, maak ons vandag weer vry van daardie bindinge wat ons daagliks van U vervreem. Amen
Carel Anthonissen
