‘n Vrolike mens is ‘n gesonde mens … (Spreuke 17:22).
Daar is meer as een ding wat die stemming waarin mense verkeer, kan verraai.
Jy hoor dit meesal in hulle stemtoon. Of sien dit in die uitdrukking op hulle gesigte. Of in die manier waarop hulle stap of optree. En só kan ‘n mens aangaan.
Onlangs word my lysie hieroor onverwags aangevul. Ek leer dat mense se gemoedstemming ook weerspieël kan word in die manier waarop hulle by mense aanklop.
Dit gebeur só.
Terwyl ek een oggend in groot erns sit en werk, is daar skielik ‘n klop aan my voordeur. Nee, nie ‘n klop soos gewoonlik in hoflike en afgemete toon nie. Dit is meer soos ‘n vrolike raps. Soos iemand wat trippelend en opgewonde met sy of haar vingers ‘n nuwe trom uittoets.
Wanneer ek oopmaak, staan my buurvrou, ‘n jong student, daar met ‘n groot glimlag. Sy kom bied aan dat hulle tuinman ons bome wat, soos hulle s’n onder een of ander plantsiekte deurloop, dié dag kan behandel – vry, verniet, sonder enige ekstra moeite of betaling.
Op my woorde: “Vanwaar die vrolike aanbod?” is haar woorde: “Ek is ‘n paar dae met vakansie. Ek voel vanoggend sommer ‘footlose and free.’ En boonop is dit lente!”
Natuurlik gaan dit nie aldag so gesellig nie. Maar wanneer daar rede vir vrolikheid is – so leer my buurvrou my weer dié oggend – moet ‘n mens dit aangryp en deel.
“Footlose and free.”
Here, een van die groot gawes van ons geloof is die vryheid en vreugde wat U ons gun. Help ons om elke dag daaruit te leef. Amen
Carel Anthonissen
