Gaan sy poorte binne met dankliedere, sy tempel met lofsange, dank Hom, prys sy Naam, want die Here is goed, aan sy liefde is daar geen einde nie, sy trou duur van geslag tot geslag – Psalm 100:4-5.
Die Griekse woord eucharisteo beteken om dankie te sê. Die kern van die woord is charis, wat “genade” beteken. Die woord chara wat daarvan afgelei is, beteken “vreugde” – dít waarna ons almal hunker. Meer en meer “heilige vreugde”.
In The eucharist beskryf die teoloog Alexander Schmemann die term “eucharist” as die geheimenis van vreugde. Dit is die geheimenis van alle geheimenisse, ook die geheimenis van die kerk van Christus. Hy sê: “Eucharist is die enigste volkome en werklike respons van die mens op God, sy skepping, ons verlossing en die geskenk van die ewige lewe.”
Wanneer Paulus in Filippense 4:4-6 skryf: “Wees altyd bly in die Here! Ek herhaal: Wees bly! Wees inskiklik teenoor alle mense. Die Here is naby. Moet oor niks besorg wees nie, maar maak in alles julle begeertes deur gebed en smeking en met danksegging aan God bekend,” begin hy by die geheim van ware vreugde: eucharisteo.
Dankbaarheid is die enigste manier waarop ’n verloste kind van God op die geskenk van die ewige lewe kan antwoord. Wie anders as ’n begenadigde sondaar kan dankie sê ondanks al die gebrokenheid binne en rondom hom of haar?Here, ek sê dankie vir ’n lewe ver anderkant dít wat ek nou sien of ervaar. Amen.
