Elke goeie geskenk en elke volmaakte gawe kom van bo af, van die Vader van die hemelligte, by wie daar geen afwyking of skadu van verandering is nie – Jakobus 1:17 (2020-vertaling).
Alles wat ons het, kom van God af – elke goeie geskenk en elke volmaakte gawe. Hy gee dit nie slegs vir ons om te geniet en daarmee te woeker nie. Hy gee dit ook sodat ons ander daarmee kan verryk.
Pablo Picasso het gesê: “Die betekenis van die lewe lê daarin om jou gawe te ontdek. Die doel van die lewe is om daardie gawe weg te gee.”
Ons kan daarop staatmaak dat God die beste vir ons en ons kinders in gedagte het. Ons mag daarvoor bid. Ons mag daarvoor wag.
Ons gawes en talente is egter nie vir alleengebruik nie. Ons moet dit met blydskap ontvang en dan uitdeel. Ouers moet hul kroos aanmoedig om ruimhartig te leef. Ons moet hulle deur ons eie optrede wys dat dit beter is om te gee as om te ontvang. Hulle moet leer om ander met hul gawes te verryk en op dié manier die vreugde van uitdeel ontdek.
Dit gaan egter oor baie meer as Picasso se sigbare talente wat ons moet vind en weggee.
Wanneer Christus in Matteus 10 vir sy dissipels sê: “Julle het dit verniet ontvang, gee dit ook verniet,” verwys Hy na die geskenk van die ewige lewe. Ons mag nie daaroor stilbly nie. Dit is ons hoogste roeping.
Here, ek wil u verlossing verkondig. Amen.
