Jesus Christus is gister en vandag dieselfde, en tot in ewigheid – Hebreërs 13:8 (2020-vertaling).
Hoe vreemd is tyd nie. Terwyl ons eenkeer na die slotepisode van ’n werklikheidsreeks kyk, besef ek dat ons almal gespanne sit en wag dat die aanbieder die wenner aankondig, terwyl laasgenoemde waarskynlik reeds besig is om die wengeld uit te gee. Ons tydsbegrip is beperk.
Christus is tydloos en ewig. Hy is die hoeksteen waarop sy kerk gebou is. Hy bly vas staan, al verander alles rondom ons. In Hebreërs 1:12 staan daar: “Maar U, U bly dieselfde, en u jare het geen einde nie.” Ons kan Christus vertrou – met ons tyd, ons omstandighede, ons hele lewe. Hy is ons ewige Verlosser.
In Jesaja 9:5 beskryf die profeet Christus soos volg: “Vir ons is ’n Seun gebore, aan ons is ’n Seun gegee; Hy sal heers, en Hy sal genoem word: Wonderbare Raadsman, Magtige God, Ewige Vader, Vredevors.” In die Nuwe Testament leer ons Hom deur sy onveranderlike liefde, genade, geregtigheid, heiligheid en waarheid ken.
Ons aanbid steeds dieselfde Christus. Dit hang van ons af of ons Hom, die ewige, tydlose God, gaan vertrou of op ons eie insig gaan staatmaak.
Ons kan sonder enige vrees of twyfel ons hand in syne plaas en ons oë op Hom vestig. Hy verander nooit nie.
Dankie, Here Jesus, dat U tydloos en ewig is, en nie ’n lewelose mummie wat in tyd gestol is nie. U is brandend van liefde vir elkeen van ons. U is God wat mens geword het. Amen.
