Here, u liefde reik tot in die hemel, u trou tot in die wolke (Psalm 36:6).
Onlangs gebruik die bekende geestelike skrywer, Brain Draper, die verhaal van die tjellis Beatrice Harrison en haar singende nagtegale as ‘n metafoor vir ‘n bekende ervaring.
In die tyd wat die nagtegale in haar tuin saam met die begaafde tjellis gesing het, is talryke opnames van hierdie merkwaardige musikale samespel tussen mens en dier gemaak. Dit is deur die BBC op spesiale dae of tye uitgesaai.
Daar was egter ‘n dag in 1943 wat die uitsending van een opname verbied is. Dit was toe 190 bomwerpers oor die gebied gevlieg het waar Beatrice met haar nagtegale gespeel het. Die bomwerpers sou dié dag die stad Mannheim in Duitsland gaan bombardeer het.
Die regering was egter bang dat ‘n uitsending van dié opname op dié spesifieke dag hulle geheime sending aan die Duitsers kon verklap, vandaar hulle verbod. Want wie na die opname van Beatrice met haar tjello en singende nagtegale luister, kan vandag nog die bomwerpers se dreunende oorvlug hoor.
Draper gebruik die verhaal om ons daaraan te herinner dat selfs in ons mees gelukkige en harmonieuse oomblikke, daar altyd die gedreun van dreigende onheil en gevaar, rampe en ellende op die agtergrond is.
Wie realisties wil leef, mag dit nooit vergeet nie. Weliswaar met die wete en die vertroue dat God se liefde ons lewe heeltyd oorskadu, ja, dat sy liefde tot in die hemel en sy trou tot in die wolke reik – ook daardie hemel en wolke wat vol dreigende gevare is.
O Here, dankie dat u liefde en trou vandag weer my lewe oorskadu en dat niks my daarvan kan skei nie. Amen
Carel Anthonissen
