Ek sal die goedertierenhede van die Here prys, die roemryke dade van die Here, ooreenkomstig alles wat die Here aan ons bewys het […] na sy barmhartighede en na die grootheid van sy goedertierenhede – Jesaja 63:7 (1933/1953-vertaling).
Die Engelse woord vir “goedertierenheid” is “lovingkindness”. “Goedertierenheid” word in die HAT as “barmhartigheid” en “lankmoedigheid” omskryf. “Lovingkindness” sê nóg meer. Ons hoor God se hartklop: Liefde. Goedhartigheid. Minsaamheid. Welwillendheid.
Jesaja het elke dag die volk se afvalligheid en opstand teen God aanskou. Tog het hy onwrikbaar bly vashou aan die bewyse van God se goedertierenheid teenoor Israel. Jesaja het God vir sy getrouheid begin loof. Hy het hom beroep op God se genade en barmhartigheid en gepleit dat die Here weer sy deernis teenoor sy volk sal opwek. Die rede wat hy oor en oor aangevoer het, was: “U is vol goedertierenheid.” Dit is God se begeerte dat ons sondeberou sal hê en ons tot Hom sal bekeer. Dan sal ons sy “lovingkindness” begryp. Ons sal aan ons eie lyf voel hóé barmhartig en vol goedertierenheid ons God is.
In Psalm 107:43 (1933/1953-vertaling) maan Dawid: “Wie wys is, laat hy op hierdie dinge ag gee, en laat hulle let op die goedertierenheid van die Here.”
Ons is kinders van ’n genadige, barmhartige Vader. Wanneer ons sy goedertierenheid in ons eie lewe ervaar, moet ons met dieselfde gesindheid van deernis, liefde en welwillendheid na ander uitreik.
Dankie vir u goedertierenheid, o Here. Ek wil in die lig van u deernis wandel. Amen.
