Goue appels wat in silwer gemonteer is, so is die regte woord op die regte tyd. ’n Goue ring, goue juwele, so is die wyse vermaning vir wie wil luister – Spreuke 25:11-12.
In Bybelse tye was goud die kosbaarste edelmetaal. Volgens aangetekende geskiedenisbronne is dit die eerste edelmetaal wat die mensdom ontdek het. Argeoloë het bevind dat artikels wat van goud gemaak is tot 6 000 jaar oud kan wees. Dit is ook die metaal waarna die meeste in die Ou Testament verwys word.
Goud se simbool op die periodieke tabel, Au, is afgelei van die Latynse woord aurum wat “dagbreekglans” beteken. Dit is helder. Suiwer. Nuutgeskep. Dit hou die verrukking en bekoring van ’n nuwe dag vol moontlikhede in.
Wanneer ons aan ons eie lewe dink, is daar soveel kosbare mense wat ’n “dagbreekglans” aan ons dae gee. “Sy is goud, hoor!” sê iemand dalk van ’n geliefde vriendin. Daarmee sê sy: “Sy is die heel beste. ’n Gehaltemens. Iemand met wysheid.”
Wyse woorde op die regte tyd word vergelyk met die glans en skoonheid van goue appels wat in silwer gemonteer is. En wanneer jy ’n wyse vermaning aanvaar, beteken dit vir jou net soveel as wat ’n goue ring en kosbare juwele beteken.
Suiwer goud is duursaam en tydloos. Tog krap dit maklik. Ons moet wysheid koester en wyse mense met liefde en sorg hanteer. Hulle is tegelyk kosbaar én bitter-bitter broos. Ons mag hulle nooit as vanselfsprekend aanvaar nie. Ons moet hulle en hul woorde soos goud oppas.
Here, maak my bereid om die woorde en vermanings van wyse mense ter harte te neem en hulle met respek te hanteer. Amen.
