Hiérin is God se liefde vir ons geopenbaar: sy enigste Seun het Hy na die wêreld toe gestuur sodat ons deur Hom die lewe kan hê (1 Johannes 4:9).
In ‘n vorige boodskap het ons gehoor dat die gebrek aan liefde die groot siekte van ons dag is.
Trouens, dit is ‘n siekte of kwaal wat veel erger en skadeliker is as enige ander bekende fisiese gebrek of siekte. Want dit verlam mense nie net uiterlik nie, maar laat hulle ook innerlik kwyn. Sodat die lewe sy glans en sin verloor en die fisiese dood vir sommige selfs ‘n uitkoms bied.
Die groot vraag is natuurlik waar die liefde wat lewe en sin kan gee, te vinde is. En belangriker nog: Hoe kan dit deel word van ons lewe?
Vir die Christen-gelowige was hieroor altyd min twyfel. In die persoon van Jesus, ja, in sy lewe en sterwe – so bely ons tot vandag toe– sien ons die egte liefde, sien ons hoe wyd en ver en diep die liefde van God vir mense strek. Dat dit selfs die mees verstote, eensame en veragtelike enkeling kan bereik.
In Jesus, so sing die sanger Robin Mark in sy bekende lied “Here is love”, sien ons hoe die fontein van God se liefde teenoor alle mense oopbreek, hoe dit soos ‘n groot, magtige rivier, ‘n watervloed van goedheid en genade elke dag onophoudelik en op vele maniere na ons toe kom en oor ons spoel.
Aangrypend sing Mark in dié verband: “On the mount of crucifixion, fountains opened deep en wide. Through the floodgates of God’s mercy flowed a vast and gracious tide. Who his love will not remember, who can cease to sing his praise. He can never be forgotten throughout heaven’s eternal days. Grace and love, like mighty rivers, poured incessant from above. And heaven’s peace and perfect justice, kissed a quilty world in love.”
Die groot vraag is of ons dit regtig glo? En belangriker nog: Is ons bereid om ons deur hierdie vloedgolf van God se liefde te laat meevoer?
Here, dankie vir die fontein van u liefde wat in Christus vir ons oopgaan. Help ons vandag weer om met vrymoedigheid daaruit te drink.
Carel Anthonissen
