“Wie ore het, moet luister!” (Matteus 13:9).
Met die gelykenis van die saaier wou Jesus allereers sy dissipels se onrealistiese verwagting van Hom en hoe Hy God se koninkryk sou laat kom, verander.
Hy herinner hulle dat sy mag dié van ʼn saaier is – iemand wat nie allereers met wapens van geweld of ander magsmiddele lande wil verower of mense wil vernietig nie, maar iemand wat met ʼn brose woord, soos die saad van ʼn saaier, God se beloftes van liefde, vrede en vergifnis in mense se harte wil plant.
Die groot vraag is: Hoe ontvanklik is ons vir dié woord of belofte? Want, en dit hoor ons ook in hierdie gelykenis, daar is baie struikelblokke wat keer dat God se woord in ons lewe kan wortelskiet en vrug dra.
Wie ore het om te hoor – dié wat hulle oopstel vir God se woord en beloftes – ervaar ongekende seën en vryheid. Hulle lewe blom en raak ʼn toonbeeld van vrugbaarheid en vreugde.
Die heel belangrikste vraag bly: Hoe luister jý vandag na Jesus se woorde? En weet jy dat dit jou lewe ten goede kan verander?
O Here, gee ons vandag ore om te luister, en om só toe te laat dat u beloftes ons lewe verander. Amen.
Carel Anthonissen
