Lees Openbaring 14:6.
Hy het ’n goeie boodskap gehad wat vir ewig van krag bly (v 6).
Kom ons kyk na Openbaring 14:1-13 se belangrikste bakens. Vers 1 praat van Sionsberg: Dit dien in die Ou Testament as simbool van bewaring en heil (Ps 121-127; Joël 3:5). Ook hoor ons hier van 144 000 mense: Dis die simbool van alle aardse gelowiges (Op 7). Hulle ervaar redding. Alle gelowiges dra God en Jesus se merk. Al God se mense dra sy eienaarsmerk!
Vers 2 wys die hemel en aarde in harmonie. Teenoor aardse eer aan die sataniese dier, is hier hemelse feesvreugde. In die hemel word gesing en feesgevier. Vers 3 vertel van hemelse musiek wat oorspoel aarde toe. Net gelowiges hier op aarde kan daardie hemelse musiek aanleer. Hulle stemme pas sommer nou reeds by dié van die hemelse koor. Vers 4-5 vertel dat gelowiges se heilige lewenswyse as bewys dien van die egtheid van hulle sang!
In vers 6-7 hoor ons van ’n eerste engel wat aankondig dat God se oorwinning vasstaan. Die tweede engel in vers 8 kondig oordeel oor sonde aan, terwyl ’n derde engel ewige straf bring oor dié wat die dier se merk vrywillig aanvaar (v 9-11). Let wel, nou word mense nie meer gedwing, soos in hoofstuk 13, om gemerk te word nie! Hulle willig self in.
Vers 12 het ’n vermaning aan ons as gelowiges: Staan sterk! En vers 13 het asemrowend goeie nuus vir die Here se mense: Vir ons is die dood die ewige triomf! Rus van ons sendingwerk breek binnekort aan.
Here Jesus, dankie vir u teenwoordigheid by u kerk.
Stephan Joubert
