Geloof is die paspoort tot Goddelike vryheid

Lees Romeine 4:1-12.

Abraham het in God geglo, en daarom het God hom vrygespreek (v  3).

Die wêreldse vryheid is op die ou end slawerny. Om vry te wees om te leef soos jy wil, is niks anders as om ’n slaaf van die sonde te wees nie. Dit sien ons vroeër in Romeine 1. Menslike vryheid is altyd ’n paspoort tot sonde. Wanneer jy die dag “mondig” wil wees om te sê wat jy wil en te doen wat jy wil, dan het die sonde jou in ’n ernstige kopklem beet. Nee, dan het jy lankal die geveg verloor. Dan is sonde jou baas, jou meester.

Slegs wanneer God mense vrymaak, is hulle regtig vry. En die pad na hierdie soort vryheid loop altyd deur geloof, nooit deur mense se goeie dade nie. So skryf Paulus hier in Romeine 4. Hy wys daarop dat Abraham die voorbeeld vir ons almal is wat glo. Hy is nie gered omdat hy sulke goeie dinge vir God gedoen het nie. Nee, net omdat Abraham volledig op God vertrou het, kon hy reg lewe.

Geloof gaan altyd enige goeie werke vooraf. Jy kan nooit goeie dinge doen om God daardeur te probeer beïndruk nie. Maar jy kan wel goeie dinge doen om vir Hom dankie te sê dat Hy jou gered het. Nee, jy moet deur die regte manier van leef elke dag vir Hom oor en oor dankie sê!

Geloof is die paspoort na God se soort vryheid. Jou geloof in Christus maak jou vry van daardie loodsware las van sonde. Dit stel jou in staat om al hoe meer te doen wat God vra.

Here, leer my vandag om die vryheid wat ek in U het, te waardeer en dit reg te benut.

Stephan Joubert