Nou sal ek onbesorg gaan lê en dadelik aan die slaap raak, want, Here, U alleen laat my veilig woon – Psalm 4:9.
Wanneer ons ons kinders met ons gebede omsirkel, val dinge in plek. Ons besorgde vrae oor hul toekoms, hul vriende, hul eksamens, hul lewensmaats kry antwoorde. Ons kan hulle met ’n geruste hart in die beskutting van God se sorg toevou.
Om vir God se guns oor my kind te bid is ’n toekomsgebed. Dit is ’n gebed vir die ewigheid. Altyd nuut. Altyd relevant. Wanneer ons hierdie gebed bid, verander ons lewensuitkyk. Ons kan ons sorge en vreugdes en onsekerhede aan die Vader oorgee. Ons kan rustig slaap in die wete dat God sal sorg.
Die God van die hemel en aarde wéét van my. Ek en Hy het vandag met mekaar gepraat. Hy weet ook van my kinders. Hy ken elkeen van hulle by die naam.
Wanneer ek volledig op God vertrou, maak ek die deur na ware wysheid oop. Dan laat ek Hom toe om my te leer hoe om ’n ouer na sy hart te wees. En wanneer dit gebeur, raak ek en my kinders en my nageslag deelgenote aan God se ewige onverganklike liefde.
Nou kan ek my op sy belofte in Psalm 103:17-18 beroep: “Maar onverganklik is die liefde van die Here vir dié wat Hom dien, sy trou vir opeenvolgende geslagte, vir dié wat getrou bly aan sy verbond en sy voorskrifte nakom.”
Here, dankie dat ek óók in die sirkel van u liefde mag vertoef. Dankie vir u beskutting en versorging – vir nou en vir ewig. Amen.
