Jesus sê toe vir haar: “Moet my nie vashou nie …” (Johannes 20:17).
Uit die getuienis van die Evangelies is dit duidelik dat Jesus ʼn besonderse verhouding met Maria Magdalena gehad het.
Eerstens was sy die vrou uit wie Hy in ʼn stadium sewe duiwels gedryf het (Mark 16:9; Luk 8:2).
Hierna sou sy Hom byna slaafs navolg en haar naam duik gereeld in die Evangelies op. Volgens sekere oorlewerings was sy die omstrede vrou wat Jesus se voete in die huis van Simon die Fariseër gesalf het. En die vrou wat, ná Simon se beswaar, deur Jesus in beskerming geneem is (Luk 7:36-50).
Baie beslis was sy die een wat ná Jesus se dood saam met Maria en Salome reukolie gekoop het om sy liggaam te balsem (Mark 16:1). En toe die Sondag aanbreek, was sy eerste by sy graf (Joh 20:1).
Maria Magdalena was inderdaad baie lief vir Jesus, en Hy vir haar. Geen wonder dat Jesus haar ná sy opstanding eerste opgesoek het nie (Mark 16:9; Joh 20:11-18). Tydens dié ontmoeting leer Maria egter ʼn belangrike les – dat egte liefde en intimiteit ook soms ʼn bepaalde afstand vra.
Vandaar Jesus se vermaning: “Moet My nie aanraak nie.” Of, soos die 1983-vertaling dit stel: “Moet My nie vashou nie …” (Joh 20:17).
Want sien, liefde kan soms té besitlik, te veeleisend en selfs te versmorend raak.
Saam met Maria Magdalena moet ons in al ons verhoudinge dit onthou en daarteen waak.
Here, leer ons vandag weer die geheim van liefde wat, terwyl dit vashou, onthou van respekvolle afstand. Amen.
Carel Anthonissen
