Jesus het vir hom gesê: “Ek is die weg en die waarheid en die lewe. Niemand kom na die Vader toe behalwe deur My nie” – Johannes 14:6.
Richard Rohr skryf: “Jesus Christus is ’n Persoon, maar terselfdertyd ’n Proses. Hy is die Seun van God, maar Hy is ook die Weg. Hy is die Doel, maar ook die Manier om by die Doel uit te kom – deur sy dood aan die kruis.”
“Die boodskap van die kruis van Christus is wel onsin vir dié wat verlore gaan, […] maar vir dié wat deur God geroep is, Jode sowel as Grieke, is Christus die krag van God en die wysheid van God” (1 Kor 1:18a, 24).
In ons soeke na wysheid lei al ons paaie op die ou end déúr en na Jesus Christus. Hy is die Bron van ons wysheid en Hy is die Eindpunt daarvan. Hy is die antwoord op al ons vrae. Hy ís Wysheid.
Here, dankie dat U die enigste manier is om by wysheid uit te kom. En dankie dat U Wysheid is. My beperkte verstand kan u wese nie naastenby begryp nie. Die oomblik wanneer ek begin dink dat ek U beter verstaan, besef ek net weer dat U te heilig en luisterryk en almagtig is om in woorde vas te vat. Daarom buig ek in ootmoed voor u troon en roep uit: U is die Weg en die Waarheid en die Lewe. U is die Wysheid – van nou af tot in ewigheid. Amen.
