Op ‘n vriend se liefde kan jy altyd reken (Spreuke 17:17).
Twee vroue wat vir jare lank boesemvriendinne was, het op ‘n stadium tragies van mekaar vervreem geraak.
Dit het gegaan oor die een se egskeiding wat verdeelde lojaliteit en verwyte gebring het.
Etlike jare lank het dit ‘n groot kloof tussen hulle geskep.
Eintlik was dit totaal onnodig, want hulle was werklik geesgenote – mense wat mekaar ook nodig gehad het, maar té trots was om dit op daardie stadium te erken.
Tot die dag toe die één se man oorlede is en die ouderdom se broosheid en siekte albei méér hulpeloos en afhanklik gelaat het.
Toe het die een wat vroeër geskei is, haar trots in die sak gesteek. Sy het haar ou vriendin, die een wat haar man verloor het, gaan opsoek. En dit was ook net betyds. Want hoewel die vriendin haar met ope arms ontvang het, het sy op daardie stadium haar sin in die lewe verloor en aan akute depressie gely.
Byna elke dag het sy, tot ontsteltenis van die kinders, gedreig om van haar huis se balkon af te spring. Hoe die familie ook al gepleit het, die dreigemente het nie opgehou nie.
Totdat die vriendin haar op ‘n dag rustig meegedeel het: “Jy spring nie sonder my nie. As jy spring, gaan ek saam.”
En dit was die einde van haar donker planne.
Kennende die meelewende vriendin se skalkse humor, kon ek nie help om te glimlag nie. Haar nonchalante, maar eerlike manier, het my opnuut die waarde van lojale en egte vriendskappe laat besef.
Dit is vriendskappe wat die pyne van misverstand en vervreemding ken, maar wat ook weet hoe om dit te aanvaar – en dan deur dik én dun by die ander een staan.
Selfs sáám die kuil van die dood met die ander een betree.
Here, dankie vandag weer vir goeie vriende en vriendinne wat deur dik en dun by ons staan. Gee dat ons self so ‘n vriend of vriendin sal wees. Amen
Carel Anthonissen
Boodskap vir Vandag word finansieel moontlik gemaak deur die goedgunstige donateurs van Bybel-Media wat daarin glo dat die Woord van die Here deur verskillende mediums versprei moet word. Dit bereik daagliks reeds meer as 8 600 lesers.
As jy dalk Bybel-Media of die Sentrum vir Christelike Spiritualiteit (wat die boodskappe se inhoud verskaf) wil ondersteun, besoek die Bybel-Media webblad of die Sentrum vir Christelike Spiritualiteit webblad.
