“Julle moet soos ’n lig in hierdie pikdonker wêreld skyn. Ander mense moet uit julle woorde en dade sien dat julle God van harte dien. Dan sal hulle sê dat God regtig ’n groot en goeie God is. So word julle hemelse Vader se Naam regtig grootgemaak” – Matteus 5:14-16 (Die Boodskap).
In Adam Small se gedig “Kô, lat ons sing” pleit hy dat God sy woorde as digter soos kerse sal gebruik om lig te maak sodat elke leser daardeur sy of haar roeping sal raaksien.
Ons is ligmakers, ons moenie in die donker wegkruip nie. Die Here bemagtig ons met die “gereedskap” wat ons nodig het om ons roeping uit te leef.
Small stel Moses se roeping gelyk aan ons s’n. Moses het slegs ’n staf gehad waarmee hy die volk uit Egipte moes lei:
dit was al wat hy gehad het
hierie man van God
’n staf
’n dooie stok
en boenop het hy nog gahakkel ok
Small voel soos Moses onbekwaam vir sy taak. Nogtans deins hy nie terug nie:
hy [God] het gavra wat’s in my hand
en vrinne
in my hand was my kitaar
kô, lat ons sing
Here, ek is ook stom en onhandig en hakkelend. Dankie dat U my nogtans wil gebruik om lig te maak. Amen.
