En dié derde sal Ek met vuur louter soos silwer gelouter word. Ek sal hulle suiwer soos goud gesuiwer word. Hulle sal My aanroep, en Ek sal hulle gebede verhoor. Ek sal sê: “Hulle is my volk.” En hulle sal sê: “Die Here is ons God” – Sagaria 13:9.
Wanneer geelkoper en sink gemeng word, het dit die bedrieglike glans van ware goud. Die oningewyde staar hom vas teen die vals skyn van gehalte en duursaamheid. Kort voor lank word hierdie glansende bladgoud egter pikswart. Dan weet jy: dít is klatergoud. Op die oog af eg en waardevol, maar met die dieper deurtastende blik oneg en waardeloos.
Die mense van Laodisea was bedrieglike klatergoud! Hulle het gedink hul Christenskap is opreg en hul getuienis kragtig. Maar in Openbaring 3:17-18 word hulle bestraf: “Julle sê: ‘Ons is ryk, skatryk, en ons het niks meer nodig nie,’ en julle weet nie dat julle ellendig en beklaenswaardig is nie, arm, blind en kaal. Daarom raai Ek julle aan om by My goud te koop wat deur vuur gelouter is, sodat julle ryk kan word.” Ons ken die uitdrukking: “Streef na goud.” Op alle terreine reik mense na die heel beste. Sport. Beroep. Persoonlike lewe. Ons mik altyd hoër. Dalk is dít wat ons as ’n edel doel beskou in werklikheid blote skyn.
Klatergoud.
Christus se diepste wens is dat ons die hoogste, suiwerste doel sal najaag. Vir dié wat enduit volhou en die wenstreep oorsteek, belowe Hy in Openbaring 3:21: “Elkeen wat die oorwinning behaal, sal Ek saam met My op my troon laat sit.”
Here, ek wil nie klatergoud najaag nie, maar saam met U op die troon van suiwer goud sit. Amen.
