Moenie by ’n vriend wat al jou pa se vriend was, verbygaan na jou broer se huis toe as jy moeilikheid het nie: ’n buurman wat naby is, is meer werd as ’n broer wat ver is – Spreuke 27:10.
Hierdie teksvers laat ’n mens weer nadink oor die belangrikheid van vriende wat al ’n lang pad saam met ’n mens kom. Salomo praat hier van ’n vriend wat al jou pa se vriend was, ’n familievriend wat jou en jou omstandighede dus deur en deur ken. Sy raad is betroubaar en jy kan op sy hulp staatmaak.
In Bybelse tye is baie klem op die belangrikheid van familiebande gelê. Wanneer Salomo die jong man aanraai om eerder by sy pa se vriend om hulp te gaan aanklop, wil hy die belangrikheid van deurleefde vriendskap beklemtoon. Ons hoef nie slegs by nabyfamilie daarna te soek nie.
Vir Salomo is vriendskap belangrik. Daarom skryf hy in Spreuke by herhaling oor die waarde van ’n goeie vriend: “Maats kan jou breek, maar daar kan ook ’n vriend wees wat nader is as ’n broer” (18:24), en: “Yster slyp yster, vriende vorm mekaar” (27:17).
Die lojaliteit, opregtheid, betroubaarheid en absolute aanvaarding van ’n deurwinterde vriend is vandag skaars. Ons moet dit nie geringskat nie. Dieselfde eienskappe wat in Bybelse tye kenmerkend van ’n ware vriend was, geld steeds. Dit is ook die eienskappe wat Jesus uitgeleef het.
Jesus was reeds ons pa se vriend. En ons oupa s’n … Al ons gelowige voorouers s’n. Ons mag nie by Hom verbygaan wanneer ons in die nood is nie.
Here, leer my hoe om ’n ware vriend te wees. Amen.
