En koop die tyd uit, omdat die dae boos is – Efesiërs 5:16 (1933/1953-vertaling).
Vroeër jare is slawe uitgekoop. Sodoende kon hulle as vry mense die geleentheid kry om die beste van hul lewe te maak. Om tyd uit te koop beteken ons moet aan ons tyd vlerke gee. Ons moet tyd sien as ’n nuwe moontlikheid, ’n geleentheid wat Christus aan ons skenk. En dan moet ons dit ten beste aanwend.
Alles wat ons wil doen, kos tyd. Selfs om die verkeerde dinge te doen. Dit kos tyd om niks te doen nie, deur winkels te drentel en sonder plan deur ’n dag te dwaal. Verlore tyd kan nooit weer ingehaal word nie. Dit is vir altyd verlore!
Om die wil van die Here te doen kos ook tyd. Die Bybel gee riglyne oor hoe ons ons tyd moet gebruik. Ons moet met God oor ons tydsbesteding gesels en by Hom hoor hoe ons ons tyd met wysheid kan bestee. Hy weet wat die beste vir elkeen van ons is vir ’n bepaalde situasie of tyd in ons lewe.
Ons kry gemiddeld 70 jaar tyd op aarde. Soms langer, soms korter. Ons moet leer om die tyd uit te koop en met wysheid te benut. Ons het net één lewe om Christus se opdragte uit te voer en sy liefde uit te leef daar waar ons woon, werk en speel. Jesus gee ons ’n afgemete tydsduur daarvoor.
Die besluit om dié tyd reg te benut lê in ons hande.
Here, leer my hoe ek my tyd tot u eer kan gebruik. Amen.
