Bo alles, wees versigtig met wat in jou hart aangaan. Wat jy dink, bepaal alles wat jy doen – Spreuke 4:23 (Nuwe Lewende Vertaling).
Op die Bybelskool-tuisblad skryf Chris van Wyk na aanleiding van die teksvers hierbo: “Hart het hier te make met jou gedagtes en jou binnewêreld, jou binnekant, die plek waar die onderskeiding gebeur tussen dit wat goed is en dit wat sleg is. In jou vertroue op God en in jou luister na Hom en in die inspanning om die regte pad te vind en daarop te hou, is daar miskien min dinge wat so belangrik is as om jou hart – jou kloppende binneste – bo alles te bewaar, om versigtig om te gaan met jou diepste oortuigings en motiverings.”
Om ’n kind op die pad van wysheid te begelei vra selfondersoek en verootmoediging voor God. Ek mag nie op my eie “kits”-wysheid staatmaak nie. Ek moet elke dag in diep afhanklikheid na God se wysheid soek.
Dikwels word ons onverhoeds deur ’n kind se optrede of woorde betrap sonder om eers ons reaksie of antwoord behoorlik te kon deurdink. Wanneer ons in afhanklikheid van God leef, sal Hy ons met sý wysheid vul sodat ons sal weet hoe om op te tree. Voordat ons ’n kind aanmoedig: “Wees versigtig met wat in jou hart aangaan,” moet ons seker maak dat ons ons eie hart elke dag ondersoek.
Eers dan mag ons vir ons kinders die woorde van Spreuke 4:4 (1933/1953-vertaling) vir hul lewenspad saamgee: “Laat jou hart my woorde vashou; onderhou my gebooie, dan sal jy lewe.”
Here, bewaar my hart bo alles. Amen.
