Paastyd is ’n tyd van teenstellings. Dit is die tyd waarin ’n mens teen jou ervaring en persepsie in leef. Die feit dat Jesus leef, herinner ons dat die dood, sonde en bose oorwin is. Die teenstelling is dat ons hierdie kragte steeds aan ons lyf ervaar. Ons troos en hoop lê in die waarheid dat dié kragte nie die finale sê het nie.
God het.
Ons praat altyd van die opstanding van Jesus, hoewel die meeste tekste van die “opwekking” praat. Die opwekking bring ons terug na die bron van ons bestaan, naamlik God. God wat skep, wek Christus uit die dood op. Dieselfde God herskep ook ons lewe deur die Gees.
Paastyd is eintlik ’n tyd van verder kyk, en nie ʼn tyd van vaskyk in dinge wat ons dink ons lewe beheer nie. Paulus se gebed in Efesiërs 1 is juis ’n gebed vir die geloofsgemeenskap om insig in die opwekking van Christus te kry.
Lisel Joubert
