En Jesus het weer met hulle gespreek en gesê: Ek is die lig van die wêreld; wie My volg, sal sekerlik nie in die duisternis wandel nie, maar sal die lig van die lewe hê – Johannes 8:12 (1933/1953-vertaling).
God is die bron van alle lig. Sy lig is nie onderhewig aan kragonderbrekings nie. Dit is standhoudend. Ewig. Want Hy is sélf die Lig.
God vra nie van ons om die bron van lig te wees nie. Hy weet dat ons beurtkragmense is. Ons lig kom en gaan. Tog vra Hy van ons om kerslig te wees.
God is ook Wysheid. Daardie ewige wysheid wat ons lewenspad ononderbroke verlig.
Teenoor God se wysheid is ons insigte soos flikkerende kerslig in die donker. Dit is nie volhoubaar nie. ’n Kers brand uit of sy vlammetjie word uitgedoof wanneer ’n ligte bries daaroor waai. Sommer netso.
Dit maak nie saak hoe klein en flikkerend ons vlammetjie is nie, God wil hê dat ons in die donkerte rondom ons sal skyn. Ons is geroep om ’n verskil te maak.
Dít alles danksy God, soos 1 Korintiërs 1:30 uitlig: “Aan God is dit te danke dat julle met Christus Jesus verenig is. Hy het vir ons geword die wysheid wat van God kom: die vryspraak, die heiliging en die verlossing.”
God is waarlik Lig én Wysheid. Hy verlig ons lewenspad. Ons kan kies of ons in Lig en Wysheid wil wandel.
Here, dankie dat u lig en wysheid ons verlig sodat ons dit na ander kan uitstraal. Amen.
