Dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie (Jesaja 40:31).
Van Ruler, die Nederlandse teoloog, merk in een van sy meditasies op dat die werklikheid is dat ons maklik moeg word. Liggaamlik moeg en geestelik moeg. Ons bereik plekke waar ons net nie meer lus is vir môre of lus is vir glo nie.
Soos iemand treffend geskryf het: Die bede in die Ons Vader waarin ons vra dat ons nie in versoeking sal kom nie, het te make met die smeekbede dat ons nie op ʼn plek sal kom waar ons dink ons geloof is nie die moeite werd nie, dat ons Christen-wees-verhaal vir ons nutteloos is nie.
Net God kan ons moegheid dra en dit selfs verander. Jesaja 40 verwoord iets hiervan: “Selfs jongmanne word moeg en raak afgemat, selfs manne in hulle fleur struikel en val, maar dié wat op die Here vertrou, kry nuwe krag. Hulle vlieg met arendsvlerke” (40:30-31).
Omdat God nie moeg word nie …
… is daar ʼn môre.
… dra Hy ons vandag.
… kan God in ons hart ʼn verwagting en ʼn verlange skep vir nuwe lewe en nuwe hoop.
Omdat U nie moeg word nie, Here my God, is daar vir my nuwe krag, nuwe lewe en nuwe hoop. Dankie daarvoor. Amen.
Lisel Joubert
