Die onverstandiges het hulle lampe gevat, maar nie ekstra olie met hulle saamgevat nie, terwyl die verstandiges saam met hulle lampe ook nog olie in houers gevat het (Matteus 25:3).
Om as volgelinge van Jesus in ʼn uur van onsekerheid en vertwyfeling waaksaam te bly, het vir die gelowiges deur die eeue heen verskillende dinge beteken.
Dit het in verskeie aksies of handelinge na vore gekom.
Die eerste was ʼn bykans onverskrokke en hardnekkige vertroue of geloof dat Christus inderdaad God se koninkryk, ja, sy blywende teenwoordigheid en krag, onder ons kom vestig het. En dat gelowiges elke dag deur God se Gees aan hierdie nuwe orde of bedeling deel kan kry.
Hierdie geloof of vertroue het hulle gedring om selfs in die slegste omstandighede nie moed op te gee nie, maar geduldig en hoopvol te bly. Om aan te hou goeddoen, liefde te betoon, vergifnis te bewys en die belangrikste: om God te bly loof en nie op te hou om tot God te bid nie.
Op dié manier het hulle, gevul met blywende vertroue, hoop en liefde – net soos die vyf verstandige meisies van Matteus 25:9 – hulle lampe brandend gehou.
Heeltemal tereg stel sommige geleerdes die beeld van die olie wat die lampe aan die brand moes hou gelyk aan die mate van geloof wat die meisies gehad het.
Want dit was presies wat dit was.
O Here, gee ons vandag meer geloof, hou ons lampe brandend. Help ons om nooit op te hou om tot U te bid nie. Amen.
Carel Anthonissen
