Dit is ook heeltemal reg dat ek so oor julle almal dink, omdat julle my na aan die hart lê. Julle deel immers almal saam met my in die genade wat God aan my gee … (Filippense 1:7).
In sy boek “Bread for the Journey”, raak Henri Nouwen, die populêre geestelike skrywer, nóg ‘n ongewone, maar besonderse waarheid kwyt.
Dié slag oor die geheim van egte gemeenskap en ontmoeting – wáár dit begin en wát dit alles behels.
Ware gemeenskap, so voer hy aan, begin by die kwaliteit van jou eie hart, daar waar jy genoeg deernis, vergifnis en genade in jouself ontdek en dit so koester en versorg dat dit ook begin deurspoel na ander.
Die bekende Duitse teoloog wat ‘n wonderlike mooi boekie, “Life together” oor die geheim en aard van egte gemeenskap geskryf het, begrond die ontstaan van die Christelike gemeenskap presies hierin. Vir hom begin dit by die ontdekking dat jy, ondanks wie jy is, begenadig is, en dan dié genade ook met ander begin deel. “This alone is the basis of the longing of Christians for one another.”
Ware gemeenskap, daardie oomblikke waarin jy so naby aan ander kom dat julle harte vir mekaar begin oopgaan, is dus nie iets wat jy ywerig of angstig kan of hoef te organiseer nie.
Dit is iets waarop jy jou in jou eie hart moet voorberei en waarop jy dikwels eenvoudig kan wag.
Wat nie beteken dat jy nie daarvoor op die uitkyk moet wees en dit moet omhels as dit oor jou pad kom nie.
Here, dankie vir u genade wat U vandag weer uitstort in ons harte en wat ons laat uitreik na ander. Leer ons om hierdie gemeenskap wat gegrond is in u genade en wat in ons eie harte begin, opnuut te ontdek en te beproef. Amen
Carel Anthonissen
