Die liefde van Christus dring ons … (2 Korinthiërs 5:14).
Paulus se lewe was nog altyd vir my ‘n bron van groot troos en inspirasie.
Allereers omdat sy lewe ons daaraan herinner dat ‘n mens inderdaad kan verander. Dink net hoe Paulus van ‘n geswore vyand van die Christendom oornag tot ‘n getroue volgeling van Christus verander is!
So dramaties en verbasend was dié verandering dat die volgelinge van Jesus aanvanklik nie aan dié storie wou byt nie. Totdat hulle hom self gesien en gehoor het (Hand 9:26-30).
Wie agter die geheim van hierdie merkwaardige verandering in Paulus se lewe ingrawe, sal weldra agterkom dat dit gesetel is in die onbegryplike liefde van Christus – Christus wat regdeur sy lewe mense soos Paulus opgesoek, vergewe en tot ‘n nuwe arbeid geroep het.
Hierdie onverwagse liefdesingryping van Christus in Paulus se lewe verklaar die ommekeer in sy lewe. Ook sy latere, aangrypende lofsang oor die liefde as God se hoogste en beste gawe aan die mens (1 Kor 13).
Want ná sy bekering was dit hiérdie liefde wat hom voortdurend sou dring (2 Kor 5:14), wat die koers en bestemming van sy lewe sou bepaal, en waartoe hy ander ook sou oproep en aanmoedig (Rom 13:8, Fil 1:9, Efes 3:14-20).
Onder andere ook vir jóú vandag.
Here, dankie vir die herinnering van Paulus se lewe – dit is dat ‘n mens kán verander en vir liefde, ja, u liefde, kan begin lewe. Amen
Carel Anthonissen
