Laat almal wat by U skuil, bly wees, laat hulle altyd juig. Beskerm dié wat u Naam liefhet sodat hulle oor U kan jubel – Psalm 5:12 (Nuwe Lewende Vertaling).
Willie Jonker verwonder hom daaroor dat waarhede wat hy ná jare lange Christenwees vir die eerste keer ontdek, reeds eeue lank in die Bybel staan en deur al die heiliges geweet en beoefen is voordat die Heilige Gees hom langs dieselfde pad gelei het om dié dinge raak te sien.
Hy skryf: “’n Mens word bevry van kleinlikheid en kleinserigheid, van die neiging om jouself te verknies en te bejammer wanneer jy eenvoudig net leer om God blindelings te vertrou en elke ding wat uit sy hand kom met dankbaarheid te ontvang.”
Dankbaarheid is die instrument waarmee ons droefheid en teleurstellings kan oorwin. Ons moet elke dag pleit: “Vul my met dankbaarheid.” Wanneer ons dán alles verloor waarop ons steun, sal ons hartsmusiek steeds dankbaarheid wees.
Al het ons niks anders nie, het ons tog nog die Vader. Dit is op sigself genoeg rede om dankbaar te wees. Daarom moet ons fyn oplet na alles wat Hy vir ons doen, hoe Hy ons dag ná dag en oomblik ná oomblik in liefde dra.
Die woorde van Asaf in Psalm 73:25, 28 behoort ook ons uitroep te wees: “Daar is niks in die hemel of op die aarde wat vir my meer beteken as U nie. Ek het die Here my God gekies as my toevlug! Ek sal van al u werke bly vertel.”
Vader, ek het niks meer nodig as net vir U nie. Amen.
