Wees elke oomblik bly dat jy die Here ken. Hy sal sorg dat jy kry wat jy wil hê. Stel jou lewe elke dag in die Here se hand. Vertrou op Hom. Hy sal vir jou sorg – Psalm 37:4-5 (Die Boodskap).
Op ’n WhatsApp-boodskap lees ek: Die verste is nooit waar jy nou is nie. Op die oog af klink dit na ’n wyse en waar stelling, eintlik voor die hand liggend. Waar jy nou is, is die naaste. Alle ander dinge of gebeure lê in die verlede of in die toekoms.
En tog kan die plek waar jy nou is, ook baie ver wees. In jou gedagtes kan jy dink aan iets wat nog moet kom of reeds verby is, maar steeds jou gedagtes oorheers. Dié gedagteprentjies is so helder dat dit ’n groter werklikheid is as die oomblik waarin jy jou nou bevind.
’n Ma se gedagtes is dikwels nie by dít waarmee sy besig is nie. Sy dink aan iets anders. Sy herleef ’n situasie waar ’n kind benadeel is, of wonder of ’n kleinding warm genoeg aangetrek is. Soms – midde-in ’n heerlike gesinskuier – is haar gedagtes elders … Die gaste wat kom kuier. Die kos wat gemaak moet word. ’n Vriendin wat sy moet bel.
Só mis sy die oomblik. Die kwinkslae van ’n klein parmant. Die wyse woorde van ’n tiener. Die veraf kyk in ’n hartseer kind se oë. Haar man wat óórmoeg is.
God wil hê dat ons voluit moet lewe. Daarom moet ons ons aan die oomblik oorgee. Nóú is al wat ons het.
Here, leer my hoe om in die oomblik te lewe. Amen.
