Toe het God gesê: “Kom Ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip.” God het die mens geskep as sy verteenwoordiger, as beeld van God het Hy die mens geskep, man en vrou het Hy hulle geskep. Toe het God hulle geseën en vir hulle gesê: “Wees vrugbaar, word baie, bewoon die aarde en bewerk dit. Heers oor die vis in die see, oor die voëls in die lug, oor al die diere van die aarde, ook oor die diere wat op die aarde kruip” – Genesis 1:26-28.
God het ons, die mens, as rentmeesters oor sy skepping aangestel. Helaas! Ons misluk in die nakom van hierdie besondere opdrag. Geen dier kan in ons plek aangestel word om na ons planeet om te sien nie. Ons het die eretaak gekry, maar ons vernietig eiehandig God se lieflike skepping.
Televisiebeelde en mediaberigte kla ons daagliks aan. Ons kyk met ontsetting na hoe die skepping verniel word: Renosters en olifante word afgemaai; vrugbare habitat word vernietig; lieflike woude word gestroop in die soeke na grondstowwe diep uit die aarde; riviere en oseane word besoedel.
Die mens se onversadigbare sug na geld en rykdom vernietig ons planeet. Ons mooi aarde verskroei. Alles sug en roep na God.
Almagtige Skepper-Koning, U het alles mooi geskape en ons as rentmeesters van u skepping aangestel. Vergewe ons dat ons u skepping deur ons hebsug vernietig. Help ons om elkeen met verantwoordelikheid te leef en u skepping op te pas. Amen.
