Wees bly saam met dié wat bly is en treur saam met dié wat treur … Wees goedgesind teenoor alle mense (Romeine 12:15, 17).
Ek het aangetroude familie wat baie privaat leef. Hulle verkies hulle eie geselskap en is sku vir ander mense.
My familie was nie so nie. Veral my pa het, dikwels tot verleentheid van my ma, daarvan gehou om uit te reik en met ander, selfs wildvreemde mense, te gaan gesels.
Soos die dag toe hy in ʼn restaurant spontaan ʼn gesprek met ʼn vreemde egpaar aangeknoop het. En toe ontdek het dat die man, soos my pa se oupa, van Ierland afkomstig was en selfs in dieselfde area grootgeword het. Die vrou, weer, was Duits en het saam met haar man ʼn kerkie in die omgewing kom besoek waar hulle veertig jaar vroeër getroud is. Dit blyk toe dié kerkie was presies dieselfde een waar my pa se skoonouers twee dekades vroeër trou aan mekaar beloof het.
Die raakvlakke was amper te goed om waar te wees.
Wat weer wys hoe die waagmoed om uit te reik en grense na ander oor te steek onverwagte skatte kan oplewer. Geen wonder nie dat die vrou met sagte oë later aanhoudend bly sê het: “Baie dankie dat jy met ons kom praat het.”
Was Jesus se hele lewe nie ook deurspek van sulke ontmoetings nie?
Here, gee ons vandag weer die moed om uit te reik sodat ons U in die teenwoordigheid van die vreemdelinge kan ontdek. Amen.
Carel Anthonissen
