Jy sien self: vir die man wat praat sonder om eers te dink, is daar minder hoop as vir ’n dwaas – Spreuke 29:20.
“Watter gebed het Professor deur die jare die meeste vir u volwasse kinders gebid?” vra ’n oudstudent aan sy teologie-professor.
“Vir oordeelsvermoë,” antwoord hy sonder om na te dink.
Om goed te kan oordeel, vra dat jy moet weet wanneer om stil te bly en wanneer om te praat. Jy moet weet of jy moet optree of iets liewer moet laat gaan. ’n Pa met oordeelsvermoë weet wanneer om ’n kind te waarsku en wanneer om hom of haar toe te laat om iets nuuts te waag. So ’n pa tree met gesag op. Ander kan sy oordeel vertrou, juis omdat dit nie uit homself kom nie. Hy kry dit by die bron van wysheid. Daarom bied dit sekuriteit vir dié wat nog onseker is.
Op ’n helder Sondagmiddag saam met gelowiges rondom ’n tafel seën die pa van die huis ons almal met Psalm 16:5: “Here, U is my lewe, U sorg vir my. Wat ek ontvang, kom alles van U af.”
En toe sluit hy af: “Hierdie stukkie moet vir ons soos ’n uitgetrapte voetpad wees. Ons moet dit so goed ken dat ons daarlangs kan stap as dit lig is – en as dit donker is – sonder om eers na te dink oor waar ons loop.”
Here, gee my goeie oordeel in elke dag se onverwagse situasies. Leer my om op u bekende veilige paaie te stap. Amen.
