Ek is by jou en Ek sal jou beskerm waar jy ook al gaan (Genesis 28:15).
Die mooiste van Jakob se droom in Genesis 28 is dat God teen alle verwagtings in nie ‘n woord oor Jakob se sondes rep nie.
Jakob is allermins onskuldig aan sy vertrek van sy familie af. Nee, hy is angstig op vlug – weg van sy ouers, weg van sy broer, weg van sy bedrog, weg van homself en sy omstrede verlede.
‘n Mens sou verwag dat wanneer God hom nou hier in die nag voorkeer, God hom ten minste hieraan sou herinner. Sodat hy sy wandade in die oë sou kyk en daarmee in die reine kom.
Maar dit gebeur nie. Die teendeel gebeur eerder: God herhaal en hernu ‘n vroeëre belofte. Soos destyds met Abraham en Isak, beloof God aan Jakob en sy nageslag nogeens ‘n tuiste in die land. Meer nog: God beloof sy troue bystand en beskerming.
Boonop staan God in vir vroeëre beloftes. Luister net: “Ek sal jou nie in die steek laat nie. Ek sal doen wat Ek jou beloof het” (Gen 28:15).
God se nagbesoek en troostende woorde aan Jakob, die voortvlugtende bedrieër, geskied teen die verwagtings van Jakob en die leser in. Dit is in alle opsigte ’n verrassing.
Maar só is die God van die Bybel, die God van Christus. Dit is ‘n God wat moeite maak met mense, wat by uitstek sondaars liefhet, wat boonop nie boekhou van die kwaad nie en hulle ook nie daarop vaspen nie.
Weliswaar, so lees ons elders in die Bybel, haat God die sonde en die onreg. Maar God skrik nie daarvoor nie, God laat nie toe dat dit die uiteindelike plan met Jakob (en met mense soos Jakob) omver gooi of verydel nie. Trouens, God is bereid om die sonde aan te vat, dit hok te slaan en te oorwin. En só die mens daarvoor te vergewe. Ook daarvan te verlos.
Dit sou later op ‘n dramatiese wyse met Jakob by die Jabbokrivier gebeur. Maar nou eers moes Jakob weet: God is sy vriend wat by hom wil staan.
Tog ongelooflik!
Dankie Here dat U ‘n genadige God is wat ons nie vaspen op ons sondes nie, maar ons bly vergewe, bly soek. Help ons om dit vandag weer van harte te glo. Amen
Carel Anthonissen
