Eet heuning, my seun, dit is lekker; die stroop is soet in jou mond. So smaak die kennis, die wysheid ook; as jy dié gekry het, het jy ’n toekoms, en jou hoop sal jou nie ontneem word nie – Spreuke 24:13-14.
Ek lees in Kos uit die Bybel, ’n resepteboek vol interessante resepte en brokkies inligting oor Bybelse kossoorte, dat heuning die gewildste versoeter in Bybelse tye was. Omdat die inwoners relatief laat met heuning begin boer het, was hulle lank op wilde heuning aangewese. Moses het in die woestyn gesing van die heuning wat in die klipskeure gevind is en Simson vind ’n byenes in die geraamte van ’n leeu. Heuning is deel van Johannes die Doper se daaglikse voedsel in die woestyn.
In Lukas 24:41-43 (1933/1953-vertaling) lees ons Jesus het ná sy opstanding gebraaide vis en ’n stuk heuningkoek geëet kort nadat Hy aan sy dissipels verskyn het.
Heuning was nie altyd so maklik bekombaar nie. Dit was dus baie gesog. Salomo maak die verkryging van wysheid derhalwe baie aanloklik wanneer hy skryf dat dit soet soos heuning proe.
Ons lees herhaaldelik dat heuning nie net ’n persoon gevoed het nie, maar ook met nuwe krag en energie gevul het sodat hy weer kans gesien het vir die uitdagings wat wag. Net so versterk wysheid ons met nuwe hoop op ons verlossing.
Here, dankie dat u wysheid soet soos heuning proe. Amen.
