Loof die Here, want Hy is goed. Aan sy liefde is daar geen einde nie (Psalm 136:1).
Alan Jones skryf oor die diepte van God se wese en liefde. Dit laat hom dink aan die woorde van die bekende skrywer Iris Murdoch:
“The point is, one will never get to the end of it, never get to the bottom of it, never, never, never. And never, never, never is what you must take for your shield and your most glorious promise.”
Nooit, nooit, nooit is die einde van God se liefde nie. Geen wonder Hadewijch, die Vlaamse mistikus van die Middeleeue, het God as “afgrond” van liefde beskryf nie. Hierdie woord dui op ʼn abyss, ʼn diepte, ʼn bodemlose poel: “Die afgront daer si min in sende, die es dieper dan de zee.”
Hierdie afgrond is God se liefde, maar ook ʼn maalstroom van God self. Die Drie-eenheid trek ons intiem in tot in hierdie liefdesverhouding sonder grense. Tot in die nooit, nooit, nooit.
Dankie, Here, dat ons kan weet en kan glo: Aan u liefde is daar nooit, nooit, nooit einde nie. Amen.
Lisel Joubert
