Die mans behoort hulle vrouens so lief te hê soos hulle eie liggame. Wie sy vrou liefhet, het homself lief – Efesiërs 5:28.
Soms volg ’n suksesvolle man wat daaraan gewoond is om in sy werkomgewing opdragte te gee en ferm op te tree indien ’n werknemer nie daardie opdragte uitvoer nie, dieselfde patroon tuis – dikwels sonder dat hy daarvan bewus is.
Hy sien slegs die koue oond raak en stel nie daarin belang om na die vrou se kant van die saak te luister nie. Die vrou voel wanneer sý normaalweg haar huishouding goed bestuur, behoort haar man te weet dat daar ’n goeie rede vir die onklaar aandete is. Sy voel soos ’n werknemer wat geroskam word en nie soos ’n vertroude, gerespekteerde spanmaat nie.
Om gelief te voel is ’n vrou se grootste behoefte. Sy beleef dit nie slegs deur woorde van liefde nie, maar deur ’n optrede wat van liefde, begrip en diep respek getuig. In ’n probleemsituasie wil sy eerder hê haar man moet bereid wees om na haar kant van die saak te luister sonder om haar te oordeel of gevolgtrekkings te maak. Deur te luister wen hy sy vrou se goedgesindheid en agting.
’n Toegewyde man en pa wil graag sy vrou en gesin versorg en daarby voel dat hy waardeer word vir wat hy doen. Dit is dikwels die dryfveer agter sy reaksies en woorde. Hy moet egter onthou sy vrou is sy spanmaat en nie sy werknemer nie.
Liefde vra vertroue, al is die oond soms koud.
Here, gee huweliksmaats die wysheid om in liefde en volkome vertroue teenoor mekaar op te tree. Amen.
