“As jy die kwaad ver van jou woonplek af hou, jou goud as nikswerd beskou, die goud uit Ofir as so min werd as ’n klip in die spruit, sal die Almagtige jou goud wees, jou skat aan silwer” – Job 22:23b-25.
God is egte klatervrye goud. Daarom herinner Hy ons keer op keer hóé kosbaar dit is. Vanaf Genesis 2, waar verwys word na suiwer goud in die Gawilastreek by die Pisonrivier, tot in die eindtonele van Openbaring hou God goud as simbool van suiwerheid en majesteit, volmaaktheid en koningskap aan ons voor.
God is heilig. Hy besit al die eienskappe van die edelste goud. Daarom loop die glansrykheid van sy wese letterlik soos ’n goue draad deur die Bybel. En daarom kan Job uitroep: “Die Almagtige [sal] jou goud wees, jou skat aan silwer.”
Ons, sondige mensekinders, spieël onsself hier op aarde in die goue glans van God se volmaaktheid. Die beeld wat ons van onsself sien, is deur die sonde skeefgetrek. Dit is dof en glansloos. Ons klere is geskeur. Ons lyk gehawend. Maar God, ons Koning, wil ons heilig en nuut voor Hom laat staan. Daarom louter Hy ons.
Uiteindelik kom ons voor die heerlikheid en glans van die Nuwe Jerusalem te staan, soos Openbaring 21:18 dit beskryf: “Die muur is met opaal gebou en die stad self met suiwer goud wat soos ’n skoon spieël lyk.” Soveel skoonheid, sonder vlek of rimpel. Die prag daarvan weerkaats sodat ons onsself – die geheiligde bruid van Christus in reinwit klere – daarin kan sien.
Here, dankie dat U ons in u wysheid louter sodat ons heilig voor U kan staan. Amen.
