Hy versorg sy kudde soos ʼn herder. Die lammers maak Hy bymekaar in sy arms, en dra hulle naby sy hart. Skaapooie met lammers versorg Hy (Jesaja 40:11).
Advent is ʼn tyd van hoop en troos. Jesaja 40:1-11 herinner ons daaraan met ʼn jubellied vol metafore. Die 1983-vertaling begin met: “Die uitkoms is hier, die uitkoms is hier!” Die NRSV vertaal dit beter: “Comfort, o comfort my people, says your God. Speak tenderly to Jerusalem.” “Troos, troos my volk,” sê die 1933-vertaling. God wil deur sy profeet ʼn nuwe tyd aankondig.
Jesaja 40 is dan ook die begin van die sogenaamde Tweede Jesaja, dié gedeelte van die boek wat in die ballingskapstyd afspeel en aan die volk ʼn nuwe toekoms en redding belowe. In vers 3 word die volk opgeroep om in die woestyn vir die Here ʼn grootpad reg te maak. Die magtige God kom sy volk haal.
Dan word die magtige God met nog ʼn metafoor ingekleur. Dié keer met die metafoor van herder. Die Magtige is die herder. Hy versorg sy kudde. Hy maak sy lammers in sy arms bymekaar en dra hulle teen sy bors (v 11).
Advent gaan oor die teenstelling van God se mag. Die magtige Koning is die herder, die pottebakker – die Koning is in die krip. Sy mag is ʼn mag ter wille van, ʼn mag wat neergelê word ter wille van. Soveel anders as die mag waarmee ons elke dag te doen kry, mag wat afbreek, seermaak en misbruik. Tog is niks sterker as hierdie dienende mag nie.
Troos my volk!
Herder, Koning in ʼn krip, dankie dat U ons vorm en versorg, dat U ons dra en troos. Dankie dat u koms ons deel van u kudde gemaak het. Amen.
Lisel Joubert
