Alles het Hy mooi gemaak op sy tyd; ook het Hy die eeu in hulle hart gelê sonder dat die mens die werk wat God doen, van begin tot end, kan uitvind – Prediker 3:11 (1933/1953-vertaling).
God het alles gemaak om by sy volmaakte tydskedule in te pas. In sy tydsbeplanning is niks ooit ontydig nie. Hy is nooit te vroeg of te laat nie. Dikwels, wanneer ons op ons lewe terugkyk, besef ons dat alles op presies die regte tyd gebeur het.
Van al God se skepsels het slegs die mens ’n besef van die onbepaalde tyd, naamlik die ewigheid. In die 1933/1953-vertaling hierbo word dit mooi gestel: “ook het Hy die eeu in hulle hart gelê …” Diep in ons binneste weet ons dat ons vir die ewigheid geskep is, al begryp ons dit nie volkome nie.
Ongelukkig eis die meetbare dinge grootliks ons aandag en tyd. Ons moet nóú rekenskap van ons werk gee. Ons moet nóú die vergadering bywoon. Ons moet vandag die verslag ingee. Die sportbyeenkoms is hierdie Saterdag. My vliegtuig vertrek sesuur.
Natuurlik is God ook in al hierdie dinge teenwoordig en dit is vir Hom belangrik. Jesus was self ook met die alledaagse besig. Hy beveel ons egter om ook die ewige skat te soek terwyl ons nog tyd het.
In Matteus 6:19 leer Christus sy volgelinge: “Moenie vir julle skatte op aarde bymekaarmaak waar mot en roes dit verniel en waar diewe inbreek en dit steel nie.”
Ons is deel van horlosietyd én ewigheid. Ons is verganklike mense, maar terselfdertyd ewigheidswesens. Ons maak skatte in die hemel bymekaar.
Here, dankie dat ek wéét ek is deel van die ewigheid saam met U. Amen.
