Daarom moet jy in stilte op die Here vertrou en jou nie ontstel oor die voorspoedige lewe van ‘n skelm nie (Psalm 37:7).
Ek vas reeds enkele weke van TV en koerante – en wat ‘n verligting is dit nie!
Dit is nie dat ek die waarde van goeie joernalistiek en die daaglikse nuus ontken nie. Karl Barth se stelling dat ‘n gelowige die koerant gedurig saam met sy Bybel sal lees, het my nog altyd sterk aangespreek. Boonop syfer die belangrikste nuus tog op maniere altyd deur.
Die gevaar is egter dat die joernalis se perspektief op of seleksie van nuus – wat dikwels sensasioneel, donker en eensydig is – jou totale siening van en gevoel vir die lewe en ons land kan bepaal. Sodat jy, soos op die oomblik met baie mense in Suid-Afrika gebeur, permanent negatief, sinies en selfs beangs is.
En dáárteen moet ons waak.
Van sulke donker nuus moet ons ons soms doelbewus afkeer. En dit eenvoudig omdat die lewe, ook hier ter lande, soveel komplekser, kleurryker en interessanter is. Ook in baie opsigte positiewer en ryker as wat in die sensasionele opskrifte van koerante weerspieël word.
Om dít egter te ontdek, is die wegkom van die daaglikse nuus belangrik. Sodat ons stiller kan word en kennis kan neem van die baie goeie dinge wat óók elke dag rondom en by ons gebeur.
Soos byvoorbeeld gewone mense wat moedig opstaan teen misdaad en onreg. Of wat op ontelbare maniere hulle hande uitsteek om te help – onder andere te help om ander te voed, te leer, by te staan, te huisves, te bemoedig en te versterk.
Daarvan hoor en lees ons ongelukkig hopeloos te min.
Here, dankie vir goeie joernaliste wat ons bewus maak van onreg en van ons verantwoordelikheid in die wêreld. Maar help ons om vandag die magdom positiewe dinge wat nié in koerante staan nie, óók raak te sien. Amen
Carel Anthonissen
