Ek het tot die insig gekom dat daar vir ’n mens niks beter is nie as om vrolik te wees en die goeie van die lewe te geniet. Dat die mens kan eet en drink en onder al sy arbeid nog die goeie kan geniet, ook dit is ’n gawe van God – Prediker 3:12-13.
Tydens ’n jong student se gedenkdiens lees die predikant bostaande gedeelte uit Prediker. Die onverwagse dood van hierdie lewenslustige mens wat die lewe met albei hande aangegryp het, het almal tot stilstand geruk. Die woorde van die predikant het troos gebring: “Jul vriend se lewe op aarde was slegs die eerste hoofstuk van sy lewensverhaal.”
Kort voor sy dood het die jong man ’n verjaarsdagkaartjie met dié woorde van Eddie Rickenbacker aan ’n vriendin gestuur: “Om te sterf is niks. Die dwaas kan dit doen. Maar om sinvol te leef – dit is genade van God. Dit is die kuns. Dit is die heerlikheid.”
Jonk soos hy was, het hy die waarde van tyd besef. Hy het geleenthede benut; elkeen asof dit sy laaste was, min wetend dat dit wel so was.
Daarby het hy die wysheid gehad om in die hier en nou te leef sonder om hom oor die toekoms óf die verlede te kwel. Hy het elke dag as geskenk uit die hand van God ontvang en dit dan tot sy eer uitgeleef.
Jack London, die skrywer van White Fang, het gesê: “Die mens se taak is om te lewe – nie om bloot te bestaan nie. Ek sal nie my dae mors deur te probeer om hulle te verleng nie. Ek sal hulle gebruik.”
Here, leer my my dae so gebruik dat ek wysheid bekom. Amen.
