As jou vyand dan honger het, gee hom iets om te eet; as hy dors het, gee hom iets om te drink, want sodoende sal jy op sy hoof vurige kole ophoop – Romeine 12:20 (1933/1953-vertaling).
Wanneer iemand jou te na kom of bedrieg, is jou eerste reaksie gewoonlik om jou gekrenkte trots te herstel. Die maklikste uitweg is vergelding. Om wraak te neem is egter geen teken van krag nie, maar van swakheid. Wraak maak van jou die groot verloorder.
Paulus skryf in Romeine 12:21: “Moet jou nie deur die kwaad laat oorwin nie, maar oorwin die kwaad deur die goeie.” Ons moet eerder die krag van liefde uitoefen.
Volgens die 1933/1953-vertaling van bostaande teksvers sal jy “vurige kole op sy hoof ophoop” wanneer jy aan jou vyand iets te ete of te drinke gee. Vurige kole op jou kop is baie erger as om oor ’n gloeiende kolebed te loop.
Hier word nie van een of twee gloeiende kooltjies gepraat nie, maar van ’n hoop vurige kole. Die pyn moet byna ondenkbaar wees. Wanneer iemand wat jy benadeel het aan jou goeddoen, is dit ook onuithoudbaar. Jy brand as’t ware van skaamte.
Die liefde bied nie bloot ’n alternatief nie. Dit bied die oplossing. Dit paai nie slegs die gevoelens en vee die onreg suutjies onder die mat nie. Dit loop die kwade trompop. En verseker die oorwinning.
Here, leer my om die kwaad deur die goeie te oorwin; om nie die persoon te verneder nie, maar om hom die krag van vergifnis te laat ervaar. Amen.
