“Here my God, U het my koning gemaak in my vader Dawid se plek, maar ek is nog jonk en onervare en ek moet regeer oor die volk wat deur U uitgekies is, ’n groot volk, te veel om te tel. Gee my die gehoorsaamheid aan U dat ek u volk reg sal regeer en in alles insig sal hê, want wie kan uit homself hierdie groot volk van U regeer!” – 1 Konings 3:7-9.
In die 1933/1953-vertaling word Salomo se versoek om insig só gestel: “Gee dus aan u kneg ’n opmerksame hart om reg te spreek oor u volk …” ’n Opmerksame hart is ’n hart wat ontvanklik is vir ander. Salomo se versugting kom uit sy diep behoefte om waarlik na ander se behoeftes te kan luister; nie net met sy ore en verstand nie, maar veral met sy hart. Hy vra indirek hier vir deernis en goeie oordeel om reg te kan laat geskied aan sy onderdane se versoeke.
As God se kinders kom ons ook soms in situasies waar ander hul vertroue in ons plaas en op ons goeie oordeelsvermoë staatmaak. Ons kan nie vooruit weet met watter probleme mense ons gaan nader nie. Daar is ook geen waarborg dat ons sal weet watter raad of bystand om te gee nie. Wanneer dit nie ’n leefwyse is om met ’n opmerksame hart te leef nie, sal ons dit nie skielik regkry wanneer iemand ons nader nie. Daarom moet ons gereeld bid vir wysheid; nie net om mense in bepaalde situasies met insig te kan bystaan nie, maar om elke dag met wysheid te lewe.
Here, gee my ’n opmerksame hart. Amen.
