Die Here jou God is by jou, Hy, die krygsman wat red. Hy is vol vreugde oor jou, Hy is stil-tevrede in sy liefde. Hy jubel en juig oor jou (Sefanja 3:17).
In Sefanja 3:14-20 kry ons ʼn vreugdelied wat die einde van die swaarkry van die volk Israel vier. Ons hoor in hierdie lied onder meer dat God sy vreugde oor sy volk besing.
God is stil-tevrede oor hulle. Hy is vol vreugde oor hulle.
Vreugde is nooit net ʼn eenrigtinggevoel nie. Dit is ʼn maalkolk. Ek ervaar vreugde omdat God in my as sy skepsel vreugde vind. Daarom geniet ek die teenwoordigheid van ander mense en vind vreugde in ander mense se daar-wees.
Ek vier nie net fees oor die goeie dinge in my lewe nie, maar ook oor die goeie dinge in ander mense se lewe.
Ek ontvang guns, en ek gun ander die guns wat hulle ontvang.
Ek ontvang God in die baba Jesus, maar ek ontvang God ook saam met ander.
Dit is ʼn gedeelde geskenk vir gedeelde vreugde.
Dankie, Here my God, dat U vol vreugde oor my is en my liefhet. Ek wil u blydskap en u liefde met alle ander mense deel. Amen.
Lisel Joubert
