Respek

My geliefdes, julle was altyd baie gehoorsaam toe ek by julle was. Noudat ek weg is, moet julle nog meer gehoorsaam wees. Vol ontsag en eerbied vir God moet julle voortgaan om aan julle verlossing gestalte te gee.

– Filippense 2:12

Op skool was ons altyd baie soet wanneer die onderwysers in die klas was. Sodra hulle die klaskamer verlaat het, was dit egter ’n ander storie. Dieselfde het gebeur met huisbesoek van die dominee, ouderling of iemand anders in ’n gesagsposisie. Almal het hulle gedrag opgeskerp en respek betoon … totdat die belangrike persoon vertrek het.

Wat presies beteken die woord respek vir jou? Vir my beteken dit om alle mense te hanteer soos ek self graag hanteer wil word – met vriendelikheid, goeie maniere en eerbaarheid.

Saam met Christenskap kom verantwoordelikheid, ook wat respek en eerbied betref. Ons is die vertoonvenster van die beeld van ons Vader. In elke faset van ons lewe verteenwoordig ons Hom wanneer ons ons met die naam Christen aan sy Naam verbind.

Gaan kyk vandag of daar dalk fasette van jou lewe is waar jy sonder respek optree en die Here se goeie Naam skade aandoen. Vat jy meer van mense as wat jy gee? Daag jy gewoonlik laat op vir ʼn afspraak? Maak jy maklik beloftes wat jy nie nakom nie? Onderneem

jy hand en mond om vir iets te betaal, maar verdwyn dan wanneer die rekening kom?

God is alomteenwoordig. Laat jou eet, slaap, werk en speel getuig van die standvastige karakter en respek wat mense van ’n verloste mens verwag. Tree altyd met eerbied teenoor almal op asof die Here voor jou in die klaskamer van die lewe staan.

Bruisgebed vir respek: Here Jesus, help my om alle mense met die nodige respek en eerbied te behandel, soos dit pas by iemand wat deur U verlos is. Tot eer van u Naam.

Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.