Hy gee krag aan dié wat moeg is. Hy maak die kragteloses sterk. Selfs jongmense raak uitgeput en afgemat. Baie jongmense struikel en val.
– Jesaja 40:29-30
Tydens ’n naweekbesoek aan my huis op die rivieroewer, ontdek ek my selfoon se battery is pap en my laaier het in die stad agtergebly. Ek besluit toe om my foon ’n paar uur in my motor te laat laai, maar ontdek later dat my motor se battery nou óók pap was.
Die volgende stap was om die noodgereedskap te gaan kry wat my motor kan jump start en dit vir die eerste keer op die proef te stel. Hoe moeilik kan dit nou wees? Maar dis toe net daar dat ek die rooi en die swart kabel verkeerdom aan die battery koppel … en gróót skade
aan my motor aanrig.
Dit het my onmiddellik aan my menslike battery laat dink. Ons almal raak uitgeput van die gejaagde lewe met al sy druk. Selfs my jong seun en skoondogter is gereeld doodmoeg omdat hulle die kers aan albei kante brand.
Om nuwe energie te kry om optimaal te kan funksioneer, is dit noodsaaklik om jou innerlike battery te herlaai. Soms is ons egter onkundig oor hoe om dit te doen. Ons probeer onsself jump start en druk die een kabel by ’n lawaaierige partytjie in en die ander by ’n oormaat kos, drank en TV-programme. Die gevolg is dat ons nie verkwik raak nie, maar eerder nog meer afgerem word.
Neem jou moeë innerlike mens eerder gereeld na die Here. Sonder jou af in stilte by Hom. Koppel jou kabels aan sy goddelike kragpunte en voel hoe Hy jou verkwik met nuwe energie.
Bruisgebed vir oorwerktes: Dankie, Vader, dat ek my pap battery by U in stilte kan kom herlaai sodat ek weer kan borrel en bruis deur die lewe.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
