Wat julle sê, moet altyd vriendelik wees en van goeie smaak getuig; en julle moet weet hoe julle elkeen behoort te antwoord – Kolossense 4:6.
As jong ma staan ek een Saterdag langs ’n netbalbaan waar twee spanne laerskoolmeisies entoesiasties heen en weer hardloop in hul poging om die groot ronde bal te gryp op pad doelpaal toe.
Net voordat die eindfluitjie blaas, verloor een van die kleingoed die bal in die doelsirkel en die ander span skiet die wendoel. Natuurlik is die verloorders teleurgesteld en stap hangskouers van die baan af.
Dit is egter die optrede van hul afrigter wat my bybly. In plaas daarvan om die spannetjie moed in te praat, vreet sy die ongelukkige meisie voor haar maats en die toeskouers uit.
Kinders is ontvanklik. Hulle kyk fyn. Hulle sien hoe ouers en gesagsfigure optree, en wanneer hulle onseker is, volg hulle die voorbeeld. Die netbalspelertjies het gehoor en gesien: Só tree my juffrou op. Onbewustelik ervaar hulle: Ek mag dus ook so met my maats praat.
Deur haar woorde en optrede het die afrigter die deur vir die kinders op ’n skrefie oopgemaak om op ’n soortgelyke manier teenoor mekaar op te tree. Hierdie meisie se maats het haar begin verkleineer. Sy het geleidelik haar selfvertroue en entoesiasme verloor. Voor die einde van die seisoen was sy nie meer deel van die netbalspan nie.
’n Gesagsfiguur se woorde en optrede sny baie dieper as wat hy of sy besef. Kolossense 4:6 is vir elkeen van ons bedoel. Ek kan dit egter nie alleen regkry nie.
Here, gee my die wysheid om te weet hoe ek elkeen behoort te antwoord. Amen.
