Omdat die Gees van Hom deur wie Jesus uit die dood opgewek is, in julle woon, sal Hy deur wie Christus uit die dood opgewek is, ook julle sterflike liggame lewend maak deur sy Gees wat in julle woon (Romeine 8:11).
In sy kommentaar oor die Lukas-evangelie, maak die bekende teoloog, Helmuth Gollwitzer, die belangrike opmerking dat ons in die goeie gewoonte moet kom om saam met die Paasberigte altyd ook Romeine 8 te lees.
In dié verband het hy veral die uitspraak van Paulus in Romeine 8:10-11 in gedagte gehad.
Daar deel Paulus ons die verrassende nuus mee dat die Gees van God wat Jesus uit die dood opgewek het, nou ook in ons woon en werk.
Die implikasies hiervan is geweldig. Om mee te begin, beteken dit dat ons die bykans ongelooflike kan weet: Diep in ons lewe, dikwels sonder dat ons dit eers sien of direk ervaar, is daar ‘n ander krag aan die werk — die krag van God se Gees wat ons aan die lewe van Christus deel gee.
Selfs sý lewe gestalte gee en sigbaar maak in óns lewe.
En dit is ‘n lewe waarin ons nie net vrygemaak is van alle onnodige skuld en vrese nie, maar ook vry is om onsself voortdurend as die geliefdes van Christus te sien en te aanvaar. Wie een eenmaal, danksy die Gees, só ver gekom het, word uiteindelik ook vry om ander te omhels.
Selfs al dink hulle nog jý is hulle vyand.
O Gees van God, vernuwe my en vul my vandag met Christus se lewe. Amen
Carel Anthonissen
