“My liggaam is egte voedsel en my bloed is egte drank. Wie my liggaam eet en my bloed drink, beleef ’n innige verhouding met My en Ek met hom.”
– Johannes 6:55-56
Suid-Afrika is een van die lande met die hoogste syfers ten opsigte van korrupsie, geweld, verkragting, egskeiding en drankmisbruik ter wêreld.
Hoe voel jy oor drank? Is jy ’n geheelonthouer? Gebruik jy drank matig en net soms saam met ’n lekker ete of tydens ’n geselligheid saam met ’n groep vriende? Of misbruik jy dit deur elke dag groot hoeveelhede in jou keel af te gooi om jou gemoed op te kikker en met
jou lewe te cope?
Drankmisbruik en drankverslawing het nie net ’n nadelige uitwerking op jou liggaam nie, maar beslis ook op jou verhoudings. My reis deur die lewe het my geleer dat ’n mens glad nie ’n sinvolle gesprek met ’n besope persoon kan voer nie. Daardie persoon is op ’n totaal ander bladsy as jy wat nugter is.
Ek is nie teen die gebruik van drank by feesgeleenthede nie, maar ek is ook baie bewus van die gevaar wat in oormaat en misbruik verskuil lê. Soveel gesinne is die slagoffers van die nagevolge van drankmisbruik.
Verslawing van enige aard is glad nie maklik om alleen te oorwin nie. As jy dus met drankverslawing sukkel, is dit dringend noodsaaklik dat jy hulp sal gaan soek by ’n kliniek of ’n instansie soos die AA.
Alle verslaafdes is op soek na ’n plaasvervanger om hulle ware honger of dors mee te stil. Vandag se vers bied vir ons die heel beste plaasvervanger: “My liggaam is die ware voedsel en my bloed is die ware drank. Wie my liggaam eet en my bloed drink, bly in My en Ek in hom.”
Bruisgebed vir verslaafdes: Here, help my om my dors en my honger by U te kom stil, met u brood wat lewe gee en met u lewende water. Ek wil in U bly, Here.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
